• 邦主@BeyonderX

享受永利皇宮的點點細心!

都有一排冇去過澳門,今次專誠去試吓啱啱開冇耐嘅永利皇宮,一探呢個皇宮嘅虛實。酒店老闆Mr Steve Wynn一向注重細節,酒店內一針一線都係經佢老人家同一班高層團隊精挑細選,確保質素。

人生總要 “豪”一次,呢間池景套房雖然未算最貴,但對邦主呢類平民嚟講已經無憾!面積大過我間屋就基本啦,間房竟然有個名牌喇吧俾你聽歌,最得人驚就係仲有兩部65吋大電視,一部喺廳,一部對住張床,就連洗手間都有電視,可以一邊浸浴一邊睇。

倫敦MoltonBrown為酒店特配的“Coco and Tonka Bean”沐浴用品

講開洗手間,不得不讚酒店嘅細心安排,不單用咗倫敦MoltonBrown為酒店特配的“Coco and Tonka Bean”沐浴用品,就連其他用具都非常精緻,最驚喜就係個超順滑剃鬚刀同竟然有恤衫領牚。

至於酒店另一賣點就非佢哋嘅音樂噴泉表演同環觀光纜車莫屬。每節大約3分鐘長嘅音樂噴泉表演,由上午11點至凌晨12點都有得睇。但邦主會建議大家食完晚飯,9 點左右先去睇。到時同身邊嗰位,一邊坐住纜車,一邊欣賞配以幻變燈光同動人歌曲嘅噴泉表演,Old school得嚟,但又感覺浪漫兼有Feel!

古語有雲「有錢就任性」!酒店其中兩間餐廳就刻意用咗佢哋老闆Steve Wynn同佢太太Andrea嘅名。一間扒房另一間就係食Fusion上海菜,至於邊間好食啲?大家自己試吓!

行到名店街,邦主覺得好似行緊藝術館咁。沿途最吸睛嘅係一座座價值不非嘅藝術珍品,主打由名師Jeff Koons創作嘅大型鋼鐵雕塑《鬱金香》同18世紀的《巴克勒公爵花瓶》。最後,千祈唔好錯過兩座巨型花卉擺設,絕對係超級打卡位。雖然個場好大,但只要順方向行一個圈,大家一定可以睇哂所有展品!

0 views0 comments

唔怕豬一般的隊友,去旅行最緊要開心!無論你係藝文青、定辦公室入面的打工仔,只要緊貼旅優之神,生活可以更精采!

© 2017 by AVLord.com All Rights Reserved.