唔怕豬一般的隊友,去旅行最緊要開心!無論你係藝文青、定辦公室入面的打工仔,只要緊貼旅優之神,生活可以更精采!

© 2017 by AVLord.com All Rights Reserved. 

  • 邦主

快閃奈良 兩大指定動作


由大阪搭近鉄去奈良真係又快又方便,唔使一個鐘就到。朝早可以喺難波附近食完早餐先至悠悠閒閒出發。今次去奈良有兩大目的,第一當然喺餵鹿,第二就係去「志津香」食番個人氣釜飯。

邦主建議大家朝早9:30左右搭近鉄出發,去到奈良都係10點鬆啲,大家去到唔使急於去影鹿同餵鹿。第一站去咗「志津香」先,只要沿著大斜路向奈良公園方向行大概10分鐘就會見到對面馬路有間小店排滿人,嗰間九成係志津香。呢度嘅釜飯吸引唔國內外嘅遊客,主打海鮮同鰻魚釜飯定食,如果撞啱時節仲有啲季節限定嘅食材,例如松茸之類。




小店只有幾十個位,主打6款套餐,全部即叫即煮,釜飯套餐包括釜飯、天婦羅同前菜。前菜同個麵豉都係一般貨所色。但個天婦羅就真係得,絕對香外脆內軟,唔會食到成口油。而主角釜飯雖然未算驚天地泣鬼神,但亦唔差,今次邦主就試咗鰻魚同「奈良七種釜」兩款,鰻魚釜就得鰻魚一樣餸,而七種釜就係成個雜會飯咁,大大小小七樣餸。

而且小店更洋溢住一片日本人嘅微細文化,餐檯上細心地放咗一個教客人點樣食呢個日式煲仔飯嘅說明書。

食飽飯,係時候去奈良公園同春日大社散吓步餵吓鹿。其實,離開近鉄站冇耐已經會見到好多鹿走嚟走去,只不過行入小小就係佢哋大本營,數量比較多同集中。公園範圍內有好多婆婆經營嘅攤檔賣餵鹿嘅餅乾,每扎1000日元,一向熱愛動物嘅邦主梗係立刻買番扎餅乾餵鹿啦。最好笑就係啲鹿真係好似傳聞咁會向你點頭,只要一餅在手,你一定會俾鹿圍。

不過,邦主希望大家做個文明嘅遊客,唔好傷害到啲鹿,更加唔好亂咁餵嘢佢哋食。今次旅程就發生咗一件小插曲,途中邦主親眼見到有一個香港家庭,老嘅就想騎上隻鹿度,其他人就任由小鹿食小朋友手中地圖,佢哋不但冇阻止,仲叫個仔繼續餵地圖俾隻鹿食。邦主真係火都嚟,立刻上前制止,呢班敗類先至死死氣攞番小鹿口中嘅紙出嚟。所以大家玩時玩,但真係要尊重動物!


餵鹿小貼事:千祈唔好著白色衫;記得帶濕紙巾