• 邦主

冇食過豬肉湯泡飯=冇去過釜山!

Updated: Sep 30, 2017


豬肉湯泡飯絕對係釜山民間傳統食品代表,店舖隨處可見。一碗實而不華嘅鮮甜肉湯完全打破過往只有辛辣嘅韓食體驗。邦主分別幫襯咗西面同海雲臺嘅小店,水準平均,絕冇失手。簡單豬肉湯配上幾款泡菜同鹹鮮嘅蝦醬,每一啖都有不同變化,令人感覺滿足又充實。



呢間海雲臺小店位於海雲臺購物街,大約得廿個位,早餐時已經坐滿客人。同好多小店一樣,全店只賣一款豬肉湯泡飯,你可以揀食同唔食。點菜過程簡單,入到去同靚女打個招呼,然後搵個位坐低等食。每份泡飯都份量十足,豬肉湯清香味濃,絕對係水準之作。


而去到西面購物區,簡單從西面地鐵站1號出口出去之後,在第一個路口的地方左轉就有多間小店選擇,邦主就揀咗間三十年老店。當經過店舖時,大家一定會俾門口嗰兩大缸雪白濃湯所吸引。店內都有幾款豬肉菜單以供選擇,但豬肉湯泡飯始終係不二之選,都係嗰句,豬有豬味泡菜有泡菜味,正!如果想加餸,可以叫份白砌豬肉,當清淡嘅豬肉同生菜遇上各式佐醬同泡菜,即時爆發驚人味力!

唔怕豬一般的隊友,去旅行最緊要開心!無論你係藝文青、定辦公室入面的打工仔,只要緊貼旅優之神,生活可以更精采!

© 2017 by AVLord.com All Rights Reserved.