• 邦主

秋風起 羊肉控必食貴州羊肉粉



秋風起,最想就係食羊肉,但係食得羊腩煲多都想轉吓口味。邦主啱啱就喺旺角試咗一間叫「貴州遵義黔營羊肉粉」嘅羊肉專賣店,聽個名都知小店主打貴州風味羊肉粉,口味正宗。除咗羊肉粉之外,最近仲新推出咗芹菜羊肉餃,全部自家制,每日限量供應,售完即止。結果,邦主今次食唔到,要留待下次😭。


舖內裝修簡單,大部份都係四人檯,但啲檯就比較細,所以四個人坐都會迫少少。講番食物,主要有粉麵同涼拌小食,價錢走大眾化路線。主餐牌一系列羊食品,羊肉、羊雜都只係碎料,最恐怖就連個腦、眼、羊波子同鞭都有得食。邦主冇胆食啲古怪嘢,只好點食番啲大路嘢好似羊肉湯飯、紅油乾拌粉、白灼羊雜同涼拌窩筍。羊肉湯非常鮮甜,肉片份量亦足夠,雖然多啲仲好。紅油乾拌粉用咗白切羊肉配上麻辣汁,相當惹味,值得一式。白灼羊雜就相對重口味,羊雜有肝、腸同肚,食落有小小騷味,點番啲孜然粉食就啱啱好。除咗餐單夠特別又夠哂地道,唔單止煮法,就連檯上嘅醬料都好有特色,竟然有未去衣嘅生蒜提供,大家想食就,自己去衣成粒啪。


嗱!真係羊鞭同羊波子!邦主都係第一次見呢啲咁奇特嘅菜式。至於其他菜色,分別有羊排、牙簽羊肉、辣子雞、紅燒排骨等等。而呢度嘅秘制羊肉仲可以一斤斤咁落單,夠哂豪氣!如果大家想食羊肉的話,真係要試吓。


地址:旺角通菜街86號利群大廈地下E號舖

網址: https://s.openrice.com/QrbS0moy400





54 views

唔怕豬一般的隊友,去旅行最緊要開心!無論你係藝文青、定辦公室入面的打工仔,只要緊貼旅優之神,生活可以更精采!

© 2017 by AVLord.com All Rights Reserved.