• 邦主

坐巴士遊濟洲有3寶旁身


大家遊首爾同釜山都可以靠地鐵,但由於濟洲冇地鐵,除非大家咁富貴出入都坐的士或者自駕遊,否則自己去玩就一定要靠巴士。


其實要計劃巴士遊濟洲又唔係咁難,最緊要有3寶喺手,第一,濟洲地圖(大家可以出發前去韓國觀光公社嘅銅鑼灣辦事處攞定,當然濟洲機場都有得攞。)。第二,就係下載番個KakaoMap APP,信我,真係好用過Google Map,話哂係韓國本土嘢。無論行走路線同時間都非常精準,就連邦主呢類「路痴」跟佢地圖行都冇迷途。

但由於呢個APP係用韓文運作,所以要識打韓文,大家千祈唔好比佢啲○┬├⊥ 嚇親,其實學打韓文好容易,只要跟住個字由左至右、上至下咁打就可以。大家比少少時間練習一陣就會上手,邦主嗰位朋友都係喺濟洲時即學即用!最後, 喺便利店買張T Money卡比車費用。


講番巴士,濟洲巴士主要分咗市內巴士同去遍遠地區嘅長途巴士。長途巴士就非常簡單,大部分熱點好似城山日出峰、西歸浦等等都可以喺中央巴士站搭到。大家只要攞住份地圖指比售票處位職員,佢就會幫你搵到邊班巴士最啱你。上咗車,建議大家坐望到個電視嗰邊,避免被企位嘅乘客擋住,同時開住個KakaoMap留意番自己距離目的地幾遠,費事錯過咗個站啦。


市內巴士就仲易,開APP輸入或GPS定位咗你身處位置,再輸入目的地同揀邊條巴士線,然後跟住APP地圖去到最近嘅巴士站就攪掂。最後,其實喺濟沖搭的士都唔算好貴。不過,有時就好難搵車,邦主就試過清晨時等幾架車先至有車肯去機場,所以大家要留意吓。

唔怕豬一般的隊友,去旅行最緊要開心!無論你係藝文青、定辦公室入面的打工仔,只要緊貼旅優之神,生活可以更精采!

© 2017 by AVLord.com All Rights Reserved.