唔知係幻覺，定係我飲大咗？！韓國餐廳啲泡菜真係好食啲，好多時仲可以任食，款色又多！不過今次唔講泡菜，而係想分享幾款去到釜山必食名物。1. 與長腳蟹決戰機張市場喺海雲臺搭181號巴士去機張市場，沿途心情都非常興奮同緊張，因為邦主好快就可以食到生猛嘅松葉蟹同長腳蟹。一步入機張市場邦主已經比無數海鮮檔同各色各樣嘅海味、新鮮蔬果所迷惑。完全進入一級興奮狀態！呢隻韓蟹竟然夠膽向邦主向張牙舞爪。只好講句”你已經是隻死蟹！”揀完蟹，靚女話要等20分鐘，叫我行吓先。唯有走去買吓海味同用各種海產醃製嘅醬料，一定要買用小河蝦醃製嘅蝦醬。終於開餐！一上前菜，竟然蠶蛹同小海螺，不過嚇我唔到，照食可也。輪到長腳蟹同松葉蟹登場，咁新鮮嘅蟹，清蒸已經足夠，食嘅係原汁原味，每啖肉都帶住澎湃嘅鮮味，邦主被擊倒了！蠶蛹除咗樣衰，其實冇特別亦冇味小海螺就鹹鹹鮮鮮幾好味上枱時，所有蟹都已經剪開哂，方便大家食，非常細心！蟹膏可以炒飯，不過要加少少錢！2. 冇食過豬肉湯泡飯＝冇去過釜山豬肉湯泡飯絕對係釜山民間傳統食品代表，店舖隨處可見。一碗實而不華嘅鮮甜肉湯完全打破邦主過往只有辛辣嘅韓食體驗。邦主分別幫襯咗西面同海雲臺嘅小店，水準平均，絕冇失手。簡單豬肉湯配上幾款泡菜同鹹鮮嘅蝦醬，每一啖都有不同變化，令人感覺滿足又充實。
海雲臺市場小店，大約得廿個位，早餐時已經坐滿客人西面有多間小店選擇想加餸，可以叫白砌豬肉。當清淡嘅豬肉同生菜遇上各式佐醬同泡菜，即時爆發驚人味力！3. 電視節目常客～韓式炒八爪魚螞蟻家可算當地名店，但價錢非常大眾化，幾仟W就有交易。同好多小店一樣，餐牌只有八爪魚、牛腸同海鮮鍋幾款選擇。邦主今次就叫咗八爪魚牛腸鍋，傳統韓式擺枱，小火爐、多款伴菜少不了，主角肥美八爪魚同牛腸上枱時係生，一睇就知係新鮮貨，只要開火煮一陣就食得。西面分店，相當受年青人歡迎，邦主食飯時就見到三、四枱學生聚會最佳食法：伴菜、紫菜、主菜撈白飯一啖過。八爪魚、辣醬、大蔥、伴菜等錯中複雜嘅味道，無法形容嘅美味口腔內全面爆發！好唔好食？！有圖有真相！4. 炭燒海鮮嘅浪漫！位於海雲臺海旁嘅하진이네（http://hajinene.co.kr/）主打各款炭燒海鮮套餐，平均4至5萬W，但份量十足材料新鮮，深受當地人歡迎。由於比較偏遠，少見外國遊客。餐廳對正個無敵大海景，平時窗口位都坐無虛席。想坐Window seat，唔該早啲霸位。抵唔抵食？！自己睇！食完仲可以去旁邊間Café嘆番件彩虹蛋糕其實釜山仲有好多好嘢食，例如河豚、海鷗肉（豬橫膈膜肉)、盲鰻、市場「掃街」⋯⋯等等。正好比個借口再去多幾次！

超好食！韓國釜山4大「抵食」推介